Hallo almal,
Oom Simen het die regte idee en dit is om jou voertuig battery en die bybehore soos yskaste, ligte, radio's, GPSe ens vanaf 'n aparte en onafhanklike stelsel te laat werk.
Die maklikste is om 'n solar paneel, reguleerder en 'n addisionele battery aan te skaf. Ek sal altyd die SLA batterye aanbeveel omdat hulle beter ontwerp is hiervoor as die LA batterye, maar neem kennis die SLA batterye wil teen hoeer spanning gelaai word as die LA batterye.
SLA = geseelde loodsuur battery 14.7V
LA = loodsuur battery 14V
Die SLA batterye het 'n maks voorgeskrewe laaistroom en moet nie oorskry word nie, die maklikste is om die solar paneel se grootte so te kies dat die maks laaistroom nie oorskry kan word nie. Die SLA battery laai egter vinniger terug na kapasiteit as die LA batterye. Daar is reeds ouens wat hulle stelsel so ingerig het en dit werk briljant en instandhoudingvry.
As jy 'n 12V yskas gaan koop kry een wat van 12V tot 24V kan werk. Wat jy dan doen is in stede van om die yskas van die battery af te werk, laat die yskas direk van die solar paneel af werk. Daar is soos gewoonlik 'n truuk. Die motor beheerder in die yskas moniteer die toevoer spanning, en normaalweg as die motor aanskakel trek die aansitstroom die solar paneel se spanning te laag en die beheerder sit die motor weer af. Hierdie gebeur nie as die yskas motor van die battery af werk nie omdat die battery genoeg aansit stroom kan lewer. Die oplossing is eenvoudig om 'n 10,000uF 25V kapasitor aan die motor se kragtoevoer te koppel. Soos almal weet stoor 'n kapasitor energie en kan dit weer uitgee indien nodig.
So hier is hoe die werkbare yskas model dan werk. Sodra die beheerder sien die spanning na die motor is konstant, se maar 22V, dan sal die beheerder die motor aanskakel. Die aanvanklike aansit stroom ("surge" vir die rooinekke) word deur die kapasitor voorsien saam met wat die paneel verskaf. Die yskas motortjie loop dan seepglad en maak die dop koud. Die model wat ek vir iemand gemodifiseer het het van 12V af sowat 4.5A van die 12V battery af getrek (die aanvangstroom gaan hier na ~8A tot ~10A toe). Met net die solar paneel en die kapasitor het die motortjie teen 22V ongeveer 2A getrek - en meer effektief gewerk en het elke keer foutvry aangesit. Hierdie opset werk omdat dit saans koel is en nie juis verkoeling nodig het nie. More as die son opkom word alles weer koud tot op temperatuur - en mens het steeds die opsie om die yskas van die battery af te laat werk ook.
Net een nota vir kennisname - nie al die yskaste kan van 24V af loop nie, daar is een van die verskaffers in SA wat hulle eie beheerder insit en die' laat nie toe dat die hoeer spanning aangewend kan word nie, so maak seker voordat jy hierdie doen.
Wat betref die liggies, hulle skyn 'n parra uit 'n pyp uit !
Die ouens wat hulle s'n see toe vat, ons gee hulle so bietjie "conformal coating" sodat die see sout nie die goed opvoeter nie, jy kan dit self ook doen, mens kry sulke spuit blikkies van die goed.
Ek het ongelukkig nog nie raad vir die ouens wat hulle liggies by die voertuig inprop en later spring hy daar in en jaag iewers heen met die liggie wat uit sy hangplek losgeskeur word en tot by die bestemming soos 'n vuurpyl in die grond agterna sleep nie, maar ek werk daaraan ;-)
Julle dink dalk dis snaaks. Ek het nou al ouens gekry wat hulle s'n agter die vierwiel fiets vir km's deur bosse gesleep het, iemand wat in sy tru-spieeltjie sien hoe skeer die liggies op die teer agterna as hulle van die dakrak af val, liggies wat in die sker van die sitplek middel deur geknyp word (met geweld kry mens enige iets reg) en die beste van alles een ou wat vir sy bakkie die 230V 3-pin proppe aangesit het omdat hulle volgens hom beter sal werk. Wel sy pel het hom gehelp en was so gaaf om die 12V 3-pin prop by die 230V verleng koord in te prop... Wys jou net, geld kan nie alles koop nie ne'.
